As orellas do Entroido

Ingredientes:

  • 100g de manteiga de vaca
  • 2 ovos
  • 100ml de anís
  • Raspa de un limón
  • 10g de sal
  • 100g de azucre en po
  • 1 cullerada pequena de canela
  • 100ml de leite morna
  • 100ml de auga morna
  • 700g de fariña
  • Aceite de oliva suave para fritir

Preparación:

Derretemos a manteiga nun bol grande e engadimos a auga e o leite mornos, a raspa do limón, o anís, a canela, o azucre en po e o sal. Batemos cunhas varillas ata conseguir unha mestura homoxénea e engadimos os ovos xa batidos. Volvemos bater e cando estean os ovos ben incorporamos imos engadindo a fariña, primeiro a metade (350g) batendo coas varillas e logo a outra metade, amasando xa coas mans, ata que non se pegue nin nas mans nin no bol. Tapamos a masa cun trapo e deixámola repousar unha hora.

Cando a masa estea repousada, separámola en bolas pequenas (coa masa que vai levar cada orella). A continuación botamos un pouco aceite nunha superficie e imos estirando cada boliña coa axuda do rodillo, ten que quedar moi fino, case transparente. Logo pínchase cada orella cun garfo para que solten o aire e frítense en aceite de oliva suave. Cando estean douradiñas, pásanse a unha bandexa con papel absorbente e bótaselle un pouco azucre en por riba.

 


Filloas de Entroido

As filloas son o doce por antonomasia do entroido en Galicia e hai tantas receitas coma parroquias na nosa terra. Na nosa casa facémolas bastante sinxelas e recheas de mel, nata ou crema pasteleira, pero pódeselle botar de todo, tanto doce coma salgado xa que ó non levar case azucre son moi versátiles.

Ingredientes:

  • ¼ L de caldo do cocido
  • ¼ L de leite
  • 5 ovos
  • 200g de fariña
  • 1 cullerada pequena de azucre
  • Unto para fritir

Preparación:

Batemos os ovos co azucre ata ter unha mestura leve. Engadimos a fariña pasándoa por un coador e mesturamos ata acadar unha masa homoxénea, que será moi espesa. Imos engadindo o leite e o caldo aos poucos ata que a masa estea bastante líquida. Se vemos que queda moi espesa, engadimos unha pouca auga. Deixamos repousar a masa media hora e xa está lista para fritir.

Botamos unha tixola no lume e mollamos cun pouco unto, é so para que non se peguen as filloas, así que non fai falla moito. Cando a tixola estea ben quente, vertemos unha pouca masa cun cullerón e repartímola ben pola tixola, cubríndoa enteira. A filloa tense que despegar da tixola ela soa, cando se despegue dámoslle a volta e deixamos un pouquiño polo outro lado. Retiramos do lume e vamos botando nun prato. Podemos acompañar con mel, marmelada, azucre e canela ou facer un recheo coma crema pasteleira, nata, chocolate.


Chulas de calacú.

Ingredientes:

  • 4 ovos
  • 750g de calacú
  • 8 culleradas de fariña
  • ½ sobre de levadura
  • 3 culleradas de azucre
  • Canela
  • Aceite para fritir

Preparación:

Descascar o calacú e botalo a cocer en 4 ou 5 cachos con moi pouca auga, isto é para evitar que a masa quede moi líquida. Cando estea tenro, retirar do lume e deixar escoar para que solte a auga e arrefríe un pouco. Namentres, bater os ovos có azucre e cando a mestura aumente de volume, engadir a fariña, o lévedo e a canela. Esmagar a cabaza cun garfo e mesturar todo ata conseguir unha masa sen grumos. Nunha tixola, quentamos aceite abundante (máis ou menos 2,5cm de alto) e vamos botando a masa cunha culler grande aos poucos. Cando as chulas estean douradiñas dámoslle a volta e deixámolas facer polo outro lado. Sacamos do aceite e servimos nun prato con papel de cociña para retirar o aceite sobrante e xa están listas para comer.


Bolo do pote

O bolo do pote era unha das especialidades de Rosa de Mazaroca, o acompañamento por excelencia dun bo cocido e moi fácil de facer.

Ingredientes para un bolo:

  • 200 g de fariña de millo
  • 50g de fariña de trigo
  • Auga do cocido quente

Preparación:

A preparación é ben sinxela, hai que xuntar a fariña de millo cunha pouca fariña triga e ir engadindo auga do cocido pouco a pouco. Traballamos esa masa tendo coidando que non quede moi líquida. Cando a masa ten unha consistencia que permite formar bolas, dámoslle a forma axudándonos dun pouco de fariña triga para que non se pegue nas mans.

Logo reservamos os bolos e botámolos a cocer na auga do cocido cando as patacas do cocido estean case listas. Os bolos non tardan moito en cociñar e cando suban á superficie estarán listos. Déixanse arrefriar e córtanse en rebandas. No momento de servir, pódese aquecer nunha tixola e para desfrutalos aínda máis, engadir un cachiño de touciño entrefebrado.


Castañeta frita con salsa de tomate

Esta preparación recórdanos á nosa infancia. A castañeta era un peixe relativamente barato, rico e fácil de atopar na praza, sobre todo no verán. Nesta época coincidía a abundancia deste peixe coa colleita dos tomates, polo que este é un prato que combina dous elementos que se atopaban no seu mellor momento.

Ingredientes

  • Unha castañeta cortada en toros e salgada un par de horas antes
  • 3 tomates grandes ben maduriños
  • Media cebola
  • Medio pemento verde
  • Dous dentes de allo
  • Fariña
  • Sal
  • Aceite de oliva
  • Aceite de fritir

Preparación

Imos comezar facendo unha salsa de tomate caseira. Aquí o máis importante é que os tomates sexan ben carnosos e teñan o punto exacto de madurez, así non fará falla botar azucre na salsa.

O primeiro é escaldar os tomates en auga a ferver para quitarlles a pel. Isto hai que facelo moi rápido, pois non queremos que cozan. Botamos auga a ferver, pinchamos os tomates cun coitelo e botámolos na auga uns segundos, ata ver que a pel abre. Retiramos de inmediato, espelexámolos e cortámolos en dados. Reservamos.

Agora picamos a cebola, o pemento e o allo en anacos pequenos. Logo botamos unha pota ó lume cun pouco aceite de oliva. Cando o aceite estea quente, botamos as verduras e engadimos un pisco de sal. Deixamos as verduras a rustrir e cando a cebola teña unha cor dourada, engadimos os tomates picados. Tapamos e deixamos a lume baixo durante media hora, logo reducimos 5 minutos a lume máis alto.

Preparamos unha tixola con aceite de fritir e poñemos a aquecer. Nun prato botamos unha pouca fariña e pasamos os toros pola fariña. Fritimos ata que queden douradiños e retiramos. Sérvense cunha pouca salsa de tomate por riba e si se desexa, poden acompañarse de patacas fritas.